السلام عليكم
هذه الرواية قريتها و عجباتني و قلت لماذا منزلهاش في المنتدى و الكل يقرها و يستمتع بها
هذه أَول مشاركة ليا وهي للعلم رواية كاملة أَلاجزاء
هذا الجزء أَلاول و كل يوم ننزل جزء إِن شاء الله
بسم الله نبدأ
الجزء الأول
لحظات غريبة بين اثنين ...خلقت الحب في قلبين
للكاتبة: سهر الليالي 84

الحلقة الأولى
ـــ يلا يا بنتي نروح بيت خالج ..
دانة ـ يمه ما أبي ..خالد كله يطقني ..
أم نايف ــ يلا يا بنتي ..هذا ولد خالج .. يمون عليج ..
دانة ـــ يمه يعورني ..
ام نايف ــ يلا يلعب وياج يالخبول .. يلا البسي نفنوفج وتعالي لغرفتي احط لج جحال وديرم ..
دانة ــ يمه ..الناس مايحطون ديرم يحطون حمره بس ,,
ام نايف ــ تعالي يالخبله تعالي ..

((دانة الفرد رقم 6 في عايلة بو نايف.. بينها وبين امها ثلاث وأربعين سنة..الكل يحمد الله ان دانة ما اطلعت منغوليه.. لان امها يابتها في عمر كبير.. كل اخوانها وخواتها كبار .. وهي تو عمرها ثمن سنوات .. اخوانها نايف وناصر وثامر وسعود ونوير..((

ام خالد ــ تعالي يالعنود سوي جاي ابوج بيجي الحين مع عمتج .
العنود ــ يا ربي ..متى أتزوج وأرتاح ..مليت ..الجاي على عبير ..أنا سويته آخر وحده ..
ام خالد ــ نادي عبير ..
العنود ـــ يمه انتي ناديها لانها بتصرخ علي ..
ام خالد ــ عبييييييييييييييييييييييييييير ..
عبير ــ نعم يمه ..
ام خالد ــ سوي جاي ..
عبير ــ زين ..
خالد ــ من بيجي اليوم؟؟
ام خالد ــ عمتك وبنتها الدانة وبنتها نوير ..
خالد ــ يهالدانة اللي باطة جبدي ..دلوعه ..
ام خالد ــ شتبي من بنت عمتك ؟؟ شسوت لك كله حاط دوبك دوبها ؟؟
خالد ــ تلوع جبدي من أشوفها ..ما أطيق شوفتها ..
ام خالد ــ جوف لا تفشلني جدام عمتك .. مالك شغل فيها ..
خالد حاس بوزه ..وفي قلبه نية سوده للدانة ..
((خالد الولد الوحيد بين اربع بنات ..عمره خمس طعش سنه .. ((

*********

نوير ــ تهقين ولد خالي بيكون موجود يالدانة؟؟
الدانه ــ من؟؟ الخايس خالد؟
نوير ــ لا تقولين عنه خايس..والله انه حبوب ..أبي أسولف معاه ..أبي أجرجره بالحجي عن عامر ولد خالتي مريم .
الدانه ــ والله انه خايس..أنا أقولج عن عامر ..تراه يشرب سجاير ..شفته هذيك المره مع عبود الخايس ..ورى الميلس يدخنون ..
نوير ــ لايكون علمتي حد؟
الدانه ــ ماعلمت إلا بسمه رفيجتي ..
نوير ــ لاتقولين لحد ..ياويلج ..
(نوير عمرها 18سنه وتركت المدرسه من كانت في صف رابع (
الدانه ــ شلبس اليوم؟
نوير ــ حيالله دراعه ..رايحين بيت خالي ..ومافي حد غريب ..
الدانه ــ امي قالت لي البس نفنوف .وكانت تبي تحط لي جحل وديرم بس شردت وقلت لها اني بحط حمره مالتج ..
نوير ــ عيب ..توج صغيره على الحمره ..ما أحط لج ..وأمي دامها قالت لج البسي جي ..في طلعه ثانية ..
**************
خالد ــ دانه تعالي ..
دانه ــ يمه لا تخلينه يطقني ..
ام نايف ــ روحي ..لا تخافين مابيطقج ..
راحت الدانه غصب عنها ..
خذاها خالد للميلس وكانوا ربعه مناحي وفهد هناك ..
خالد ــ يلا يادانه ..السؤال المعتاد ..من أحلى ؟؟ أنا ولا نايف أخوج ؟
دانه ــ نايف أحلى ..
مناحي ــ اتركها يا معود ملينا من هالفلم اللي تسوونه كل مره ..
خالد ــ نايف أحلى ؟
ومسك يد دانه عورها ..صرخت دانه ..
دانه ــ يالخايس اتركني ..
خالد ــ مابترك يدج لين تقولين من الخايس؟؟
دانه ــ انت الخايس ..
خالد ـــ مين ؟؟
وشد على يدها بقوة ..
دانه ــ أنا خايسه عورتني آآآآآآآي ..
خالد ــ والحين من أحلى ؟؟ أنا وولا نايف أخوج؟
دانه ــ .....................
خالد ــ وليش منطمه؟؟ ماتردين؟؟
دانه ــ انت خااااااااااايس .,..ما أحبك أكرهك ..تخرع ..
خالد ــ أحلى ..يعني لازم مثل كل مره ..عاد ..ترحمي على نفسك ..
مناحي ــ اتركها حرام عليك ..
فهد ــ خل يأدبها أحسن ..
دانه ــ انت جب ..
مناحي ــ ويييييييييييييييييييي ..تستاهل فهد ..محد قال لك تحرش .
فهد ــ هالبنت ماتستحي خليني أطقها ..
خالد ــ لا ..حشى .,.,محد بيمد يده عليها غيري ..حفرتي قبرج بيدج يالدانه ...تشهدي ..
دانه ـــ يماااااااااااااااااااااااااااااااااااااااااااااااا اااااااااااااااااااااااا

***************

بعد 10 سنوات ....
___________
تنهدت وماقدرت تمسح دموعها ..
نايف ــ امسحيها في ويههي يالدانه ..منيره ماتقصد ..
(منيرة زوجه نايف وام بناته بدر البدور وقمر الزمان (
الدانه ــ خلاص أخوي ..أنا بروح بيت أخوي ناصر ..
نايف ــ ناسيه انج ثانويه.. وأنج تداومين مع بناتي في نفس المدرسه؟؟ وين رايحه لبيت ناصر , بيته بعيد ..
الدانه ــ هانت ..كلها شهر ...وأخلص الامتحانات ..وبروح بيت ناصر..
نايف ــ لا..بناتي تربوا معاج ..وأنتوا بتخلصون مع بعض ..الثانوية .. وبتظلين معاهم لين يجي نصيبج ..
الدانه ــ ما أقدر نايف ... ما أقدر ...تعبت ..منور من سكنت هنا من سنتين وهي نازله تجريح فيني ...
نايف ــ البيت بيتي ..
الدانه ــ بس هي صاحبة البيت ..وهي حامل الحين وأكيد تبي الغرفه للبيبي اليديد ..
نايف ــ لا ,,تدبرنا هالمسألة .. بدر وقمر بيصيرون في غرفة وحده ..
الدانه ــ لا ...لا ..حرام عليك ..هم صج توم ..بس مايشبهون بعض..انطر شهر ..بس شهر خلها تتحملني شهر واحد ..
)من ماتت ام نايف .. والدانة متشحططة بين بيوت اخوانها .. بعد ماوزعوا الورث ..(
****
ــ كل عام وانت بخير ..
خالد ــ وانتي بخير يا حياتي ..تدرين انتي الوحيده اللي جبرت بخاطري ودقت تهنيني بيوم ميلادي ..
ــ وأنا أقوى أنساك ..وين بنتقابل الليلة؟
خالد ــ وين ماتبين ...بس ها يبي معاج الواجبات ...لان اليوم مارحت الكلية مثل منتي خابره ..
ــ من عيوني ..
خالد ــ تسلم عيونج ..يلا باي اشوفج الليلة في مكانا المعتاد؟
ــ وحنا عندنا مكان غيره؟

يتبع

الدانة ــ انتي للحينج ماخلصتي من سالفة الاسم؟
بدر البدور ـ أكيد ما ارتاح ..قمر مرتاحه بسمها لان لو نادوها بالاسم الاول بس بيكون عادي ..بس انا..اللي مايناديني بسمي كامل يناديني ببدر بس ...مليت يا عمتي ..
الدانة ــ اسمج حلو ..
بدر البدور ـــ مدري شطرى على ابوي علشان يسميني هالاسم التعبان ..
الدانه ــ والله انج بطرانه ...احمدي ربج ..أنا رايحه لغرفة قمور ..
بدر ــ كالعادة ماتعجبج سوالفي فترورحين لقمر ..والله اني ما احب انطق اسمها عن لاتحسب اني امدحها ..
الدانة ــ ردينا لموال قبل؟؟
بدر ــ اييه ..وانتي بعد لاتنادينها قمر ناديها قهر ..
الدانة ــ جب يا بدر ..
قمر ــ هلا عمتي تعالي ..
دانة ــ اتصلت فيني عبير ..تقول خلينا نمرها نسوي كيك معاها لحفلة اخوها اللي بيرد من السفر بعد يومين ..
قمر ــ خالد؟؟
دانة ــ ياني أكرهه ..أتذكر أيام قبل كله كان يطقني صج حمااااااار ..
****************
شيماء ــ راح أشتاق لك ..
خالد ـــ أنا بسافر بكره الصبح ..مايمديني اوصل بسرعه للبيت .أبي أفاجأهم ..ولا ياحياتي كان بقيت معاج ..
شيماء ــ اقول لك رح اشتاق لك تقول لي قصة حياتك؟
خالد ــ لا تتبجحين ..تذكريني ببنت عمتي ..أكرهها ...والله اكرهها ..وما أطيق أشوف ويهها ..
شيماء ــ صحيح انك قليل ذوق ..انا وين وانت وين ..قول لي راح أشتاق لج بعد ..شتخسر ..
خالد ــ شيماء ..من تعرفت عليج ..قلت لج ..علاقتنا بتنتهي في اليوم اللي بسافر فيه لهلي..وأنا خلصت الجامعه وتخرجت من شهر ونص..بس نطرت اضبط اموري.. اليوم آخر يوم بيني وبينج..تقولين لي راح اشتاق لك؟؟
شيماء ــ فكرت ..يمكن تكون وزنت الامور وانك تحبني ..
خالد ــ اليوم عيد ميلادي وين هديتي؟
شيماء ــ مثل عادتك ..كالعادة ...تغير الموضوع ..أنا بروح وانت هاذي هديتك ..باي.

انتهيت من البداية والتعريف..
خالد تخرج من كلية الطب.. وتم لين آخر لحظة يساعد شيماء في الواجبات.. وأخيرا بيرجع لبلاده..
ومن هنا ببدأ اللحظات بأسلوب مختلف 100%
___________________________________

غيرت ملابسها وفي قلبها غصة..كلام منيرة جرحها..للمرة لعاشرة من انتقلت لهنا ومنيرة تقط عليها نغزات كل وحده اقوى من الثانية..البست عباتها وشيلتها وطلعت.. تعبت من هالتشتت بين بيوت أخوانها ..الله يسامحكم ...ليش كان لازم تبيعون البيت وتتركوني ما أحس بأي أمان ولا انتماء ..
قمر ــ عمتي ...شفيج؟؟ ...ساكته من طلعنا من البيت ..
ردت ــ أفكر لو بدر يات معانا ..ماكان أحسن؟
قمر ــ بدور ماتعرف تخبز الكيك ولا الحلويات بتقعد تزعجنا بس ..وبعدين عمتي نسيت آخر مرة لما تهاوشت مع عبير ؟؟ مسكينة عبير فوق ماهي متعنية وعازمة بدور تقوم الثانية وتهينها في بيتها ..
ــ برايج ...
))خالد ..ما أقدر أشوفه ..أحس بجبل ثقيل على صدري ..((
رجعت بذاكرتها ليوم عرس صالحة من عشر سنوات ..لما صار اللي صار ....لكن ..
قمر ــ عمتي ...اليوم انتي كله سرحانه ..عندنا اربع ساعات نساعد فيها عبير ..لان لازم ندرس في الليل ..

******

ــ مع السلامة ..
شيماء ــ مع السلامة ...
طلع خالد سلم الطيارة وهو محتار ..طبعا بعد ساعة وشي بيرجع لبيت أهله اللي ماشافهم من أربع سنوات..بس شلون استقبالهم بيكون له؟؟ بيفرحون بشهادته وانه دكتور وكل هذا بس في قلبه حسره بسبب الموقف اللي صار من اربع سنوات له ..بينسون الموقف ولا بيحاسبونه؟
في الطياره حاول انه يقطع الوقت بالقراءة ..لكنه مل.. طل من الدريشه وغابت أفكاره..تذكر الموقف السخيف اياه.. مايدري وين كان مخه لما خذ شيماء بيت أهله في أول اجازة..مايقدر ينسى النظرة اللي ارتسمت على وجوه اهله كأنها خيبة امل..شيماء لقيطة..عاشت طول عمرها في ملجأ..ولما خلصت الثانوية التحقت مثله بجامعة الاردن يدرسون الطب البشري ,,تولع في شيماء وايد ..لدرجة انه خذها لبيت اهله..طبعا بيت اهله ناس محافظين شيكون شعورهم لمايدخل عليهم ابنهم مع رفيجته؟؟؟

****

((الهموم مالها آخر ..واذا ظل الواحد يفكر فيها بيشيب راسه ..خلينا انسى واستانس بوقتي أحسن لي ..((
ــ دندون ..تعالي شوفي الكيك استوى ولا لا؟
ــ الحين بيي .. يبي لها عشر دقايق وتصير عجيبة ...جهزتي الكريمة والقشده؟
عبير ــ جهزت كل شي ..
قمر ــ عبير لحقي على الكيك كلته العنود ..
عبير ــ عنوووووود ..
العنود ــ شسوي ..مشتهية آكل كيك ..
عبير ــ متى بترجعين بيت ريلج؟؟ لاعت جبدي ماصارت نساة ..
العنود ــ جب جب ..هذي اول مرة أحمل ,,ولازم تقومين فيني ..
عبير ــ انا وراي عرس بعد ست شهور ماني فاضيه لدلعج ..
قمر ــ هو بيرجع بعد ست شهور؟
عبير ــ عنده دورة في الصين.. والله يستر .اذا مالف على وحده ,,
قمر ــ لا شكله ابن ناس ..
عبير ــ شفيها عمتج؟
قمر ــ اليوم امي قالت لها كلام مافهمته بس هي ازعلت ..
عبير ــ شكلامه؟
قمر ــ ما ادري ..مثل ما أذكره ..

***

ــ تاكسي ,,
(الدوحة تغيرت وايد عن قبل ..اربع سنوات غربة ..بيتفاجأوون فيني لاني قلت لهم اني بوصل بكره..كلها نص ساعة ..وينتهي هالقلق اللي أمر فيه (

***

عبير ــــ في ايش سرحانة؟
دانة ــ ولا شي ..
عبير ــ شقالت لج ام قمر اليوم علشان تختبصين جي ؟
دانة ــ ولا شي ..
(قمر الهبلة ...أكيد قالت لعبير شي) ..
عبير ــ ماقلتي لي لقيتي مدرس انجليزي؟
دانة ــ لاء ..خاص مالقيت واحد زين بس في المعاهد في حصص وأنا ما أبي حصص لان الي مافهمته شي معقد شوي..
عبير ـــ لا يا خالد أخليه يدرسج انتي وقمر وبدور ..
دانة ــ كم مرة قلت لج اني ما اطيق اخوج هذا ؟؟
عبير ــ اسكتي..امي من درت انه بيي ..حبست عمرها في الغرفة ..بعد سواد الويهه اللي سواه مو عارفين شلون بنقابله ..
دانه ــ عادي كأن ماشي صاير ..
عبير ــ عاد انتي من متى ماشفتيه؟؟
دانه ــ من عشر سنوات لما يا آخر مرة لأمي في المستشفى ..الله يرحمها ..اذكر ضربني على راسي وصرخت مخترعة فضربني مرة ثانية فتميت أصيح ...أكرهه الحمار ..
عبير ــ حمار ريلج ,,اتركي اخوي في حاله ..وأخيرا بكره بيي ..قلبي عاد يدق بقوة من زمان ماشفته ..الباب يطق اروح أشوفه ..
ارجعت دانة لهمومها .. الانجليزي ..الفصل الاول يابت كل الدرجات شبه كامله ماعدا لاانجليزي بينها وبين الرسوب نص درجة..
نايف قال بيدور لها على مدرس ..بس الحين موسم الامتحانات بدى ..والثانوية محد بيكون متفرغ ..

يتبع......

ربكة غريبة في الصالة ..
ليش ماينفتح الباب؟
فتحت عبير الباب ..عرفها عبير ..بطلت حلجها شكبر حس انها بتبلعه ..
ــ مابتدخليني البيت؟؟
عبير ــ خالد؟؟ ييت ..يماااااااااااااااااااه الحقي خالد يا ..

**

قمر ــ دانة شالربكة اللي في البيت ؟؟
دانة ــ مدري ..
قمر ــ اطلعي شوفي ,,أنا براقب الفرن ..
دانة ــ مالي خلق ...روحي انتي ..
دخلت العنود وبطنها العود يسبقها ..
ــ اخوي خالد يا .
رفعت حواجبها قمر دهشة ودانة حاست بوزها معصبة ..
طلعوا اثنينهم للصالة ..

****

شالجمال اللي يشوفه وقف جدام عيونه؟؟ اول مرة يشوف وحده بهالجمال..من هذي ام العيون الناعسه والشعر الحرير اللي نازل على جبهتها ..خدودها التفاح ذاته ..قمر ..قمر ..مستحيل تكون اخته بشاير ولا اخته صالحه اللي هم في السعودية ؟؟...هذي لعنود وهذي عبير ...من هذي؟؟
سمع شهقة من وراه ..كانت امه ..بسرعه باس راسها وضمها لحضنه..وامه ما مسكت نفسها من الفرح الزغاريد شغالة .. ابنها الدكتور رجع أخييرا ..

***

عيونه تروح وتجي على للي لفتت نظره ...
عبير ــ أخوي ..هذي بنت ابن عمتك ..قمر الزمان ..
خالد ــ قمر ؟؟ ...سبحان الله اسم على مسمى ..
قمر ؟؟ وهي قمر .. قمر حست بنظراته فاستحت ..خالد كان وسيم ,,,رزه ..طويييييييييل ...وعيونه كبيره وحلوة ..
عبير ــ وهذي طبعا مانسيتها دانة ..
التفت خالد لدانة في نفس اللحظة التفتت له ..
خالد شاف وحده يكرهها ما يقدر يطل في ويهها ..
دانة شافت واحد خايس متأكده أنها تكررهه وايد . نذل ..مدت بوزها ..وبنفس خايسه ــ مبروك الشهاده ,,
خالد بطريقة مستفزة ــ أكيد مبروك لي... حاصل لج تصيرين دكتورة ..
دانة ــ مستغنية عن وجع الراس ..
دخلت المطبخ معصبة ..ودخلت قمر وراها ..
دانة ــ دخلي شعرج كله طالع ..
قمر ــ هذا ياعمتي اللي كنت تسبينه طول الوقت؟؟ حرام عليج يهبل ..يينن ...ماقدرت على نظرة منه ...
(دانة حست انه ماتطيق تسمع عنه شي وخصوصا المديح(
دانة ــ قمور جب ...راسي يعورني ..هذي آخر كيكة ونرجع البيت عندي امتحانات لازم نخلصها ..
قمر ـ ياعمتي ,,,علشاني خلينا نيلس ساعة وحده بس لين يي خالج ..
دانة ــ خالي موموجود ..مابيرجع لين المغرب ..
قمر ــ يا عمتي ..شوي بس شوي ..
دانة ــ اوكي اخلص هالكيكة ,, واروح اتمدد في غرفة عبير ...صحيني بعد ساعة ..
قمر ــ من عيوني ..

***

خالد كل قلبه وفكره مع قمر ..واو ..عجيبة ..جمال رباني خارق ..والجسم ولا منيكان ..

**

فتحت عيونها بثقل ..حست ان الغرفة غريبة عليها ... لحظات تذكرت انها في بيت خالها ..لكن ..مافي ضو نهار في الغرفة ..
الساعة كانت ثمان ونص ..
نزلت تحت وتفآجأت بالكل في جلسه سمر ..وبينهم قمر ..
غمزت لها علشان يروحون ...

***

في السيارة ..
ــ انتي ماقلتي لي انج تبي ترجعين تدرسين؟؟ وأنا وصيتج تصحيني بعد ساعه ..أشوفج نسيتيني ثلاث ساعات نايمة ..
قمر ــ عمتي ,,,يا خال ابوي ولزم علي أتعشى .. وبعدين راح الصلاة لو يدري انا ماتعشينا بيزعل ..
دانة ــ الحين شقول لامج لادرت ان خالد رجع؟؟
قمر ــ آآآآآآآآآآه ..خالد ..
دانة ــ شفيج مسبلة عيونج؟؟
قمر ــ يهبل ..يهبل ..أأي عمتي ..من كلامج كرهته صج ...لكن اليوم ..غييير ..
دانة ـ ماشاءالله وحكمج هذا استنتجتيه في هالثلاث ساعات اللي قعدتيهم معاه؟؟
قمر ـــ عمتي ..انسان مثقف مهذب وسيم ..
دانة ــ الحمدالله والشكر ...والله مافيه ولا شي من هالقلتيه ..انسان نذل واطي ..ماتعرفين شسوى قبل ..
قمر ــ شسوى؟؟
دانة ــ ماني متكلمة على الريال ..يمكن تغير ..ويمكن الله يكتبه من نصيبج ..ماني قايله ..
قمر ــ ياعمتي فديتج .قولي ياعمتي ..
وتمت تحن لين ارضخت دانة ..

***

نزلت من السيارة وهي منصدمة ..
دانة ندمت انها قالت لها ..
قمر ــ عمتي علشان جي كرهتيه كل هالمدة؟؟
دانة ــ اييه ..بس انتي مالج علاقة في الموضووع ,..هالموضوع صار من زمان أكثر من عشر سنوات ..
قمر ــ بس يا عمتي ..ليش كنتوا تطاققون دايما؟؟ قبل اللي صار ؟
دانة ــ مرة صدته يغازل سحر رفيجة نوير وقلت لخالي ....
قمر ـ هو يكرهج لهالسبب ؟؟؟؟
دانة ــ لا ...هو يكرهني علشان العواقب اللي يات على راسه بعد هالسبب..مسكين أكل طق وبهدلة..وفوق هذا خالي حبسه في البيت شهر كامل ومدري شسوى بعد ..
قمر ــواللي صار من عشر سنوات ..لين الحين انتي حاقده عليه مع اني ماظن انه طق وايد .....
دانة ــ هو كسر يدي من الطق..ولما شافته امي ياتها نوبة قلبية من الخرعة علي..صراحة ..هو ما غلط بحق امي..أمي قلبها تعبان ..وماتتحمل ...الله يرحمها ..
قمر ــ الله يرحمها يدتي..أنا لو مكانج كان ذبحته..بس يدتي ماماتت الله ستر..وعاشت بعدها كم سنه..الله لطف فيه ولا الحين كان الكل يلومه ..
دانة ــ ومن قال لج اني مالومه؟؟ النوبة اللي تعرضت لها امي كان لها مضاعفات ..لولا هالنوبة كان امي معانا الحين ..
قمر ــ عمتي ..ماعرفت لج ساعة تلومينه وساعه لا ...بعدين هذا عمرها ومكتوب لها ..ومحد يقدر يغير اللي صار ..
دانة ــ اسكتي خلاص ...خلينا نتصرف عادي وبعدين نخلص كلامنا ..
قمر ــ عمتي ..أعتقد اني أحب ....خلاص ..أنا متأكده ..
دانة ــ لا تستعجلين ..لاحقة على كل شي ..

يتبع....

نتمنى من الاعظاء الكرام القراءة قبل الردود
وشكرا على زيارة موضوعي